以豪門家族爭權為題材的《家族榮耀之繼承者》開播以來即火速報捷。眼見成績亮麗，一眾高職日前就聯同演員舉行慶功宴時，更為女主角送上神秘生日會，並由好拍檔林峯捧著粉紅色大蛋糕現身，全場大合唱生日歌，壽星女佘詩曼非常驚喜，笑眼瞇瞇，合十許願後吹洋燭，安安姐、張鳳妮、Toby等上前擁抱她送祝福。
開席前，寰亞電視節目製作（香港）有限公司董事總經理暨總監製梁家樹感謝台前幕後努力，他說：「每次埋位開工，睇到大家付出嘅努力，同埋合作精神令我好感動。至於成績，喺咁強嘅陣容之下，梗係好好啦！」全場拍掌歡呼。
而《家族榮耀之繼承者》中阿佘、林峯和黃浩然三角愛情關係，令人看得牙癢癢。最新劇情講到阿佘坐冤獄，她說：「雖然坐監，但有兩位護花使者喺我身邊，其實都幾幸福。」戲中飾演阿佘追求者、富二代「Rio」的黃浩然笑說：「我記得，好似一出獄即刻又搵我借錢啦！」三人哈哈大笑。
周旋兩位型男之間，觀眾都替阿佘頭痛，黃浩然說：「我老婆都有追劇，佢話梗係揀我，唔通揀阿峯咩？」林峯贊成：「我都係咁揀！」阿佘問：「唔係問你老婆，係問你本人點揀？」他說：「咁梗係揀我啦！」阿峯和議：「我老婆都係咁講！」他們笑指浩然戲中角色對阿佘非常豪爽，取笑他是提款機。浩然說：「不過，如果我係阿佘，我會揀『高浚』（林峯飾），愛情係無原因。」阿佘強調他們這三角愛情線發展非常緊張，網民熱議她在愛情與麵包中如何取捨。
黃浩然又劇透，表示踏入第四周劇情將與阿佘講金又講心，他說：「嚟緊『Rio』終於唔使淨係同『皓兒』講錢，佢將有一場好情深嘅表白，好好睇。」林峯亦透露「高浚」將面臨重大危機，他說：「之後『高浚』都幾慘，將經歷一啲大事，亦牽涉到丘家。其實『高浚』都幾孤獨，好彩嗰段時候『皓兒』有喺身邊陪伴。」黃浩然不是味兒，說：「扮可憐！」至於阿佘能否爭取家業繼承權，觀眾引頸以待。
至於劇中飾演丘家大少奶、「皓兒」後母的DaDa，預告將有一場令人震憾的動作場面，她大賣關子，說：「我都係動作組，係手部動作，至於咩手部動作，就要留意劇情啦！」她還透露與劇中「老公」許紹雄戲裏戲外都非常Sweet，說：「Benz哥（許紹雄）角色人物性格鮮明，令人好安心，佢好勁，網民一致好評，封佢做『暖男天花板』！」@
------------------
📰支持大紀元，購買日報：
https://www.epochtimeshk.org/stores
📊InfoG：
https://bit.ly/EpochTimesHK_InfoG
✒️名家專欄：
https://bit.ly/EpochTimesHK_Column
